.jpeg) |
| Foto Ilustrasi |
Berita Bahasa Daerah Tanimbar : Seira
Saumlaki, Jurnalinvestigasi.com - Pilkada 2024 sarser vali rok ba okun Bota anma vali rok, Bota ii ni velan aa wen siklabir. anlabir nua ovun kubang valvulin betiana anvalak ni ngri ma nala Bota anban ulu boma ngri ra lanur.
Tamata isa nera ven ami ma amfonak naran aa anfalak ne, Bota ii not ya ne nangri wen nua arna Tnebar i, anvalak weni ; Fyili ya boma bir wawat anbana owun lolin, anfalak vali ne fyili ya boma atbangun Tnebar ovun lolin.
"Bula nala ba nati ma andoku ne not karya sian matan munuk ler, nlabir tamata ra munuk ma tamat riwun ii arta ira ma ruruk yawat sian, karya weni ne siklabir sian na munuk ler af matan owi. Baaaa ??? Okun valfili 27 November ii ne afyili Bota obin tewol ?" Anfalak wenya.
"Baaaa ? Afyili ya tewol ne wen wola fyili ya ne ufrika ufwol ler ta ?," Ia anfalak wenya betian anmalit.
Anfalak vali ne, Pilkada 2024 ii dekat tsingare, wen Bota anber mia ovun kubang valvulin ne myala ni kubang aa watan ma deka fyili ia te okun anma ewal ne atmat vali rok.
"Mikatak rok lingan ra to ? Utan ra watan ne sian ler, betian aa wolar ber vali bir utan Bon Ret ra ba, wen amjak ma anma ewal ne myot ler ngean lutur ma fyo mu ovun tuala rivun wol ne okun amyata.
Ava ya wenya, falak rok ne deka mjak den itrana tewol. Mrenar dawan rangri boma falfili ne fyil did banban ulu ovun lolin ma nakatak Tnebar ovun lolin, wol aa myotu itrana nakwanak nal kubang valvulin ba okun afyil vali rok ma natewal anma ewal ne atmat vali rok.
Ba ni wan watan lenya rok, mingnanang usin ma deka myebang ler Bota te ami maleng rok Bota ma andak lingan watan ma sian rok neka wol wan obin ba vulat awa ma ia sian watan rok. Mlyobang tenabira ne deka fyil ler ooo.
"Bota oooo Bota... deka mwa rok te okun ami mmata oooo... Mwaju watan ma mot af kul sut den ba deka mwa rok wol ne okun avara mat munuk, tamat riwun arna Tnebar ii raven rok oa se itrana". ankusi ma naran watan leni rok. (Usa)
.jpeg)
